故事

受害人的故事

性暴力發生,大眾及旁人的論調都傾向責怪當事人:怪他們的衣着有問題、怪他們不懂反抗、怪他們自拍、怪他們被他人拍、怪他們報警、怪他們不報警…但偏偏對漠視當事人的意願作拍攝、分享、要脅行為的侵犯者視若無睹,讓不少受害者寧願獨自承受痛苦,也不願意向其他人說出經歷和感受。

我們透過「影後樹窿」計劃及《影像性暴力經驗調查》收集了一些正經歷影像性暴力的當事人的故事和心聲,邀請您設身處地,感受他們的處境。

*所有故事均按當事人意願使用化名

嗰時我已經同佢講分手,但佢想用呢啲影像箝制我…如果我哋唔復合,就公開影像,摧毀我嘅生活,要脅我同佢一齊…就算件事過咗五年到好,其實我都仲驚緊。講翻我前女友偷拍嗰陣時,咁其實佢原本都係想留個底有啲咩係可以要脅到我嘅,嗰陣時我已經同佢講分手,佢係想用呢樣嘢箝住我 ······ 咁佢就係想自己得唔到嘅寧願係毀滅咗佢,咁樣要脅我同佢係翻埋一齊。

我有就呢件事報警,但係警察話無野可以做。我俾人咁樣要脅,仲係用片,一來吿唔入,因為警察話佢冇一個好明顯嘅要脅行為,只系講過D。啲警察都話你咁樣係報唔到警,落唔到案,咁我真係冇辦法,個警察都建議我你自己諗下點樣去處理呢件事。所以成件事都拗曬頭,只係無奈……once佢不爽,都有可能send出黎。所以真係會驚,就算件事過咗成五年都好,其實我都仲驚緊。

我知道佢好多嘅個人資料,而佢條件好好,形象都係陽光正氣多朋友仲好多粉絲,所以信任佢,係佢乞求下玩咗一次sex cam。本來個日約出嚟食飯,對我好客氣,同我傾心事講秘密,之後再告白,但當我拒絕佢幾次,話我暗戀緊其他人,同要求車返我返屋企之後,就突然變臉拎手機出嚟播偷錄我嘅片,叫我唔好咁高竇,同埋想刪就要同佢搞嘢。

嗰刻佢嘅形象反差好大,我試過兇佢話報警,又試過喊同埋求佢,氹佢話你唔會係咁嘅人嚟。但覺得即使我掌握佢咁多資料,我個刻都無辦法對佢施壓同阻嚇到佢,佢都預備好曬點應對。

最後答應咗同佢搞換刪片,但係酒店房趁我去咗廁所期間佢set cam想偷錄我,但比我發現個cam,之後先再搞,但我唔肯定佢最後有無刪曬所有片,可能上載咗上iCloud。

之後維持係好疏嘅朋友關係,都無再威脅我,表面上無嘢仲會出嚟一班人食飯。但佢有時會刻意提起個晚嘅事,而語氣係無內疚,反而好滿意佢同我之間有過關係同埋有共同秘密。我好嬲,但無可奈何。我唔會報警,因為佢似乎唔會打算公開,而我都唔敢提起去刺激佢。

通常,私影攝影師同埋model溝通嘅過程入面,佢會問「你可唔可以俾自己嘅作品相我睇下啊?」,咁我會俾一啲例如有著衫、時裝,或者尺度冇咁大嘅相俾佢睇。其中一個攝影師咁樣回應我:「其實我有睇過你俾人流出嘅相,你流出嘅相同你俾我嘅好唔同喔!」我嗰刻嘅感覺就覺得有啲價值受損,根本唔係我想展現嘅嘢,竟然有人可以係另外一種情況下睇到。嗰個感覺好唔同,係未經我嘅同意底下俾人見到,唔係我想要嘅嘢。

我印象中有一次有一組相係有包含我嘅IG個帳戶名,因為係嗰一組相流出咗之後嘅三個月內,大概有4到5個人去DM我IG,我有改過自己IG名,但係我發現冇用。我幾肯定有一組相包含我的個人資訊 …… 有人拎到呢啲相之後,去我嘅IG或者facebook direct我,同我講「小妹妹有影相wor,要唔要出黎同哥哥見下面呀」。 

俾人喺街上偷拍完之後,我覺得自己成為一件物品咁俾人去影,其實我唔想,唔知點解啲人係覺得OKAY就可以去隨便影我。我覺得佢哋(偷拍者)係會覺得 「我幻想咋嘛,唔需要你同意」。

如果同屋企人講,因為我屋企人係好傳統嗰啲,佢就會話 「肯定係你著短褲」啲人第一件事會評論「佢一定係著短褲喇」、「佢一定係著短裙喇」、「走光嘅話你咪著裙,著長啲囉,著褲囉,解決到㗎」……

受害人本身就係受害,你唔好再講呢件事鬧落去,唔關佢事㗎。有啲人話「你著晒罩袍咁咪得囉!」唔關事㗎,你包到咁都係有人影……可能除咗教人唔好偷拍之外, 都講話其實偷拍係同你著咩無關,你著到好似木乃伊咁…… 總會有人覺得值得影,總會有人覺得可以將佢嘅慾望擺上去,唔會因為你著得密實咗而去改變。

條片已經上了網,有咁多人看過,我自己的感受是,多一個不多少一個不少是沒有分別。而我沒可能永遠刪除一些已流出的東西。正如想當年,某明星的電腦在修理時,被人發現有很多女星的照片,其實事件就算淡化了,你現在還可以找到。而很明顯,他們亦都報了警。所以,我覺得沒有東西有可以永久消失的可能性。我覺得已經沒可能解決到。

I was approached on dating apps and I was ask to perform certain sexual behavior during video chat. That was when they filmed the whole process. They threatened me if I cannot pay them, they will distribute the materials online and send them to my friends and family relatives. My immediate response was a sense of shame. I did paid them some money and just when they keep on pressing for more. I made an announcement on my social media and cut all communication with the blackmailer. I am glad that I have a circle of supportive friends.

Back To Top
遇到性暴力事件,不是你的錯。您更非孤獨無助,我們絕對關心及支持您。

風雨蘭性暴力求助熱線:2375 5322

SafeChat 網上支援WhatsApp 6730 1892
服務時間
星期一至五: 09:00 - 22:00
星期六: 09:00 - 13:00
性暴力法律諮詢服務:rainlily.org.hk/lc
風雨蘭性暴力支援為性暴力受害人及支援者提供法律諮詢、報案及司法程序陪同、情緒支援及心理輔導、醫療等協助- 了解更多